留學學日文，揀間語言學校、定文化學校好？

經過一年半嘅留學，我會答：文化學校。一開始揀KICL，純粹係貪佢校園大、功課嚴。無深思過晌香港讀日文效率低，係因為我只透過書本、而無透過語言背後嘅文化去學。喜出望外地，除咗課堂結構強，KICL嘅文化配套，製造到好好嘅語境畀外國人應用日文；甚至幫助培養對日本文化不同範疇嘅興趣，從而決定到要晌浩瀚嘅日文裏面，學邉一類表達最啱自己。

1.校園

KICL坐落晌瓜生山學園嘅藝術大學裏面，所以可以用大學嘅設施。校園好多粗獷主義（brutalism）建築，同香港街道風景都有契合之處。

正門大階段

Canteen所在嘅「至誠館」重係隈研吾事務所設計，都幾勁抽。因為位處京都最東邊嘅瓜生山，「至誠館」天台個京都全境日落view、雪景view，個人認為比清水寺有過之而無不及。我都經常上樓上打躉。

夏日

冬雪

又因為係藝術大學嘅關係，校園時不時就有畫展、裝置展，唔會齋返學放學咁悶之餘，有啲作品介紹係可以練読解嘅同時，順手了解埋日本社會環境。

大學生作品

2.課堂

又愛又恨。恨係內容包羅文法、語彙、聴解、読解、会話、作文、演習7大範疇。次次聴解聽真實電台、電視節目，我都會叫苦連天；每朝の発音、会話，每次演習嘅專題報告，都會俾friend笑我似機械人。但就係晌叫苦同講笑之間，有日不知不覺，就突然可以同日本人基本溝通喇。嗰種紮實、全面，又無可否認係好。

同學作句日常

專題報告一例

3. 文化日

原先以為係每學期一次嘅遊樂活動，但去過三次之後，覺得係對日文成長好重要嘅學習經驗。我哋可以揀學茶道、華道、和太鼓、清水焼、漆器、友禅染、日本舞等。上workshop之前會有一節堂教相關專有詞彙，以便當日同文化導師嘅全日文溝通。我上過和太鼓、華道同日本舞班。

讀KICL之前，好刻板印象以為和太鼓係男人嘢、華道同日本舞係女人嘢。但華道先生係手藝上佳嘅男性，日本舞嘅男舞亦原來好英氣。

形易神難嘅華道

剛柔並濟嘅日本舞

大學嘅和太鼓隊「悳炎」亦有好多出色女鼓手，KICL畢業禮時，全校好多認識嘅同學上台表演，好齊、好磅礡，表演同學投入到相視而笑。我同朋友們都睇到好感觸。爾啲深度文化體驗，係普通遊客或留學生，都難以學習甚至接觸嘅範圍嚟。

KICL畢業禮

4. 大學學會

我哋可以自由參加大學嘅學會。初初我日文唔好，無自信參加。有日朋友無端端撩我一齊玩，幫我聯絡埋會長，咁就入咗三味線學會「丈山会」。現任指導先生係長唄杵勝会嘅家元成員，杵屋禄宣。每月一度嘅稽古，好和風地係晌神社裏面上堂。從來無諗過人生有機會接觸日本人專屬嘅藝術世界，亦成為我學好日文嘅一大動力。

三味線稽古場

5. 校外活動

同班同學一齊去名勝做任務嘅活動。我哋係去紅葉名所「大原三千院」。嗰日全巴士都係本地人，逼到上唔到車。紅葉季時大原嘅日本人比例，重高過京都市中心。因為任務，局住睇咗好多景點歷史、用日文問咗好多問題，算係突破。朋友帶咗好多零食去分享，俾大家笑好似小學生，但最後真係好似小學旅行咁難忘，難忘到連當日嘅氣溫都記憶猶新。可能係因為晌一個靚到好唔真實嘅環境，同朋友一齊經歷過。

三千院入口

學校包埋茶席

同窗身影

6. 環球朋友

上述提及過好多次「朋友」。KICL有樣好，係國藉比例較平均。學生五湖四海，文化背景差異大，共同語言好自然會變成日文之餘，自己嘅國際觀亦會變得廣闊。我嘅朋友當中，有法國、摩洛哥、美國、韓國、泰國、台灣等地嘅人。老老實實，自己唔算好勤力背書，大部分實用日文，都係成日同班老友去玩，聽得多就學識咗。晌多元嘅環境裏面，搵到同自己投契、可以深交嘅好朋友，係開心嘅。

一齊唱ｋ練日文

一齊食同學間廣傳嘅隱世魚生

講完一輪，唔知有無講得明白，點解我話讀文化學校，比讀語言學校好。學一種語言，學埋背後文化，真係好重要。我以日本文學家太宰治，對於文化嘅描述作結——

「笑い。これは、つよい。文化の果の、花火である。理智も、思索も、数学も、一切の教養の極致は、所詮、抱腹絶倒の大笑いに終る」(《思案の敗北》)。

祝願大家搵到滿載歡笑嘅留學生活，搵到文化之果、語言學習之極