「日本嘅留學生活」「日本嘅就業活動」

日本嘅留學生活、我整體用「平凡」嚟形容。所謂嘅「平凡」，係指以一個在地日本人嘅角度去生活，真正感受呢個地方嘅氣息。

一年半前，我參加咗學校嘅和太鼓部，即係香港嘅「club」。日本學校嘅「部活」睇電視、漫畫就睇得多，喺和太鼓部就可以親身體驗到佢哋嘅熱血🔥，同認真。和太鼓逄星期二練習。當大家都專注其中，就發覺呢1.5個鐘過得好快，所以好多時大家都會留低再練多陣。離開學校嘅時候，有時仲會一齊睇到好靚嘅夕陽。

雖然唔會同大學部一齊練習，但大學部嘅前輩會嚟指導我哋。一開始會有啲壓力，一來日文未係好流暢，二來大學部技術好高，而且動作好仔細。但前輩們真係好用心教，又會陪住大家一齊練。今年、我仲有機會同大家一齊喺「藝能祭」同畢業典禮上台表演！完全超出左當初參加和太鼓部嘅預期！

畢業嘅半年前，我開始左「就活」，即係日本嘅「就業活動」。其實日本嘅大學生喺畢業一年前就要開始「就活」。包括準備履歷表、參加唔同嘅企業講座同參加面試準備班。親身參加過面試準備班，先知道喺日本面試有好多禮儀、敬語等等要留意。

起初得返半年時間都好擔心。不過同就業指導嘅老師面談過，定好timeline，一步一步去達成。老師鼓勵我哋多嘗試，面試次數愈多，愈熟練。雖然有曬心理準備，但收到「面試不合格」嘅電郵點都會唔開心。經歷一番錯敗後，最終都搵到適合自己嘅工作，喺京都展開我嘅新旅程。

好開心當初選擇KICL,令離開左校園生活好耐嘅我，有一個好圓滿嘅校園體驗。