點解嚟咗呢間學校讀書？
我本身係香港已經有非常穩定嘅工作，但係突然覺得生活應該要精彩啲，想挑戰一吓自己，試吓唔同嘅生活，所以就決定離開香港去學嘢。前排係日本第一次試滑雪，鍾意咗滑雪呢樣嘢，希望可以多啲機會滑，而且本身又鍾意日本，所以就揀去日本讀日文。
揀係京都讀書嘅原因係佢嘅傳統文化比其他地方濃厚，環境又靚，又唔算多人，生活節奏又比較慢同舒服，而且想揀嘅語文學校KICL喺呢度。KICL係喺一間大學（京都藝術大學）入面，我會鍾意喺一個校園環境讀書，相比起其他語言學校，感覺青春啲同多嘢玩啲。
KICL讀書日常
我係2024年嘅4月入學。嚟日本前只係喺香港上咗大約60-70個鐘嘅日文堂，平時都無睇動漫無追日劇。可能係面試嗰日太緊張，簡單嘅題目都唔係好答到，所以學校嘅編班試分咗我去最低班嘅初級一班。
一星期每日9:00-12:30嘅課堂包括咗讀解、聽解、文化、寫作、會話同演講嘅練習，仲有好多唔同嘅活動去練習日文，真係全方位學習。上堂嘅時候會有好多機會同同學對話練習。除咗平時嘅日文課堂，學校都有提供好多唔同嘅堂俾有興趣嘅人上。例如今個學期，我就報咗京都文化，對於京都嘅文化有咗更深入嘅認識。
我係初級一班嘅日子非常歡樂，有嚟自泰國、台灣、中國、美國、澳地利、突尼西亞同印尼嘅同學，呢班嚟自香港嘅就得我一個。班入面最細嘅有19歲，最大嘅有49歲。大家嘅背景都好唔同，所以傾計嘅時候會認識多咗好多嘢。我周不時都會同同學約去公園野餐，開party燒嘢食慶祝生日，落堂係課室整芒果糯米飯食，去吓同學嘅屋企煮飯仔食⋯⋯
上堂都好歡樂㗎，老師都好有趣，好有心機教。雖然教嘅時候係全日文，但老師會就返我哋嘅程度用一啲簡單嘅學過嘅術語去講解。另外，學校有搞文化日，同學可以根據自己嘅興趣報唔同嘅文化體驗，例如茶道、和太鼓、花道、製作和菓子、清水燒、日本舞⋯⋯超級好玩～4月嘅春季學期，仲有校外活動，初級班去咗清水寺，然後老師俾咗啲任務我哋做，都幾得意㗎～
校外生活
讀KICL嘅原因係可以用大學嘅圖書館同參加大學嘅社團。社團方面，我今次就試咗華道（日式插花）同K-pop舞團，然後識咗唔少日本嘅同學。
放咗學返到屋企通常會煮晏晝食，然後就開始溫書做功課。有時會去鴨川跑吓步，間唔中會去玩抱石，然後就煮晚飯食㗎啦～呢度嘅物價比香港低，所以去supermarket買餸都幾開心～
星期六日，我就會去和服租借店返part-time。我日文唔係特別好，但因為有香港人嘅優勢，即係英文比較好，又識普通話又識廣東話，所以特別容易搵到工作。我覺得香港人喺日本嘅就業機會都會比較高。和服店着和服嘅老師都係日本人，所以都會練到少少日文㗎。當然希望讀完語言學校呢兩年日文會大大進步，變成可以講四種語言。如果有機會認識到我，我都可以幫手介紹你去和服店度打工～
平時放假都會係京都深度遊覽一下，因為買咗單車，所以會踩單車周圍去。另外，京都踩單車都幾安全，京都嘅司機都好有禮貌，要經過你嘅時候都會揸出少少，唔會貼住你嚟揸。喺暑假期間，可以用學校嘅學生證免費去京都嘅一啲景點。因為咁樣，我跟住個list周圍去，發掘到好多好靚，但又唔係好出名嘅景點。
利用身在日本嘅優勢，暑假或者長假期都會去一啲國內旅行。學生買JR車票會有八折！！由4月到9月，我已經去咗三個旅行，仲同一班日本人一齊爬咗富士山。期待去到冬天可以瘋狂去滑雪！
第一個學期完結嘅感想
我遇到嘅人、學到嘅嘢、做咗嘅事、體驗唔到嘅文化⋯⋯所有嘅經歷都令我覺得放棄香港嘅工作嚟日本體驗係非常值得。喺日本讀書係我覺得做過最好嘅選擇！
0 件のコメント:
コメントを投稿