從香港到京都，再到日本就職：我這兩年的奮鬥軌跡

2023年4月，喺香港正式辭職，作出對自己人生一個好大嘅決定——去京都文化日本語學校(KICL)留學。我當時嘅日文程度只係好皮毛，只係喺香港學咗150個小時左右，可以講係啱啱入門嘅程度。但係因為唔想將來諗返轉頭嗰陣，會後悔自己當時無做到呢個選擇，所以最後都係膽粗粗咁離職，由香港帶埋貓貓一齊搬咗去京都，正式重返校園，開始喺一個完全用日文嘅環境生活。

我選擇京都文化日本語學校(KICL)，係經過網上搜集過資料後，再加上參加咗KICL舉辦嘅網上講座所得出嚟嘅決定。最吸引我嘅一點，KICL係京都藝術大學其中一間分校，位置亦係喺京都藝術大學裏面，可以完整咁享用大學校園設施，令我有一種重返大學時代嘅感覺。對於我呢種已經出嚟做咗好多年嘢嘅人嚟講，重返校園嘅感覺真係好難能可貴。另外，京都本身環境清幽，節奏相對東京同大阪係慢好多，少咗都市嘅壓迫感，多咗一份寧靜。京都嘅環境，係會好自然咁令人靜落嚟，呢一點對於學習日文真係好有幫助。

喺KICL讀書嘅兩年，可以話係我人生其中一段最充實、亦都最具挑戰性嘅時間。由最初連基本會話都講得唔好，到慢慢可以用日文同老師同同學溝通，呢個過程並唔輕鬆。每日上堂、做功課、溫書，幾乎成為生活嘅全部。但同時，我亦都喺呢段時間認識咗好多來自唔同國家嘅朋友，有台灣、泰國、韓國、法國、比利時等等。雖然大家背景唔同，但都為咗同一個目標努力——學好日文。課堂以外，我哋會約埋一齊去玩、一齊食飯，分享各自文化，呢啲經歷真係好難忘。

最後一個學期嗰陣，大約係2024年10月，我開始參加學校提供嘅就業課程。呢個課程對我嚟講幫助非常大，因為佢唔單止會教基本求職知識，仲會針對日本企業文化，教我哋點樣準備履歷書同職務經歷書，點樣做自我介紹，甚至連面試時嘅禮儀、說話方式都會逐一指導。對於一個外國人嚟講，日本求職流程對比起香港真係好唔同，如果無上過就職課程，根本係唔會知日本就職活動係應該點去應付。

縱使有課程幫助，搵工過程依然非常艱難。一邊要應付日常課堂，一邊要不斷投履歷、準備面試，日間要上堂，夜晚又要練習面試問題，壓力係非常之大。而且，日本公司對日文要求普遍都唔低，即使已經讀咗接近兩年，都會喺日文對答上會捉錯用神。再加上日本本身搵工困難度都好高，連老師都話當年佢自己搵工都好辛苦。求職期間，幾乎每日都會收到拒絕信，所以經常都會覺得好挫敗。

但我一直提醒自己，當初決定嚟日本，就係想喺日本開展新生活，不斷同自己講唔好咁易放棄。於是我繼續調整策略，改善履歷內容，多啲練習面試表達，亦主動請教老師同前輩。慢慢地，我開始感覺到自己有進步，面試時冇以前咁緊張，回答問題亦更加有條理。

最終，喺經歷無數次失敗之後，我終於成功獲得一份工作，正式喺日本就業。當收到offer嗰一刻，內心非常之激動，因為呢個結果，係兩年努力同堅持換返嚟嘅成果。

就職之後，我已經喺日本生活咗一年。雖然都會仲會發生唔明對方說話嘅情況，但只要係態度誠懇，始終都會成功去理解對方想表達嘅內容。由最初連買嘢都會緊張，到而家可以同事溝通，甚至參與工作討論，我清楚感受到自己嘅成長。如果當初冇喺KICL留學，冇經歷過嗰兩年密集嘅學習同生活，我相信自己係冇可能喺日本搵到工作，更加唔會有今日嘅自己。

回望呢段由香港辭職，到京都留學，再到成功就業嘅旅程，當中有辛苦、有迷惘，但亦充滿收穫同成長。京都呢個地方，唔單止教識我日文，更加教識我點樣面對挑戰、堅持到底。呢段經歷，將會係我一生人裏面最寶貴嘅回憶。